Ba al dakizu dagoeneko zertaz mozorrotuko zaren aurten? MOZORROTRUK azokan 200 mozorrotik gora dauzkagu 2025eko inauterietan berriz biziak eta gozatuak izatearen zain. Denetarik aurkitu ahal izango duzu bertan: mozorro osoak, pieza solteak, osagarriak edota zure jantzi berezi eta jasangarria sortzeko zatiak ere.

Mozorroen dohaintzak egin edo bata bestearengatik trukatu nahi dutenentzako jasoketa puntua ere izango da azoka, eta horretarako edukiontzi berezi bat egongo da salerosketa zein lantegi espazioen ondoan.

Gainera, zure mozorroari konponketaren bat egin nahi badiozu edo goitik behera eraldatu, doako bi lantegi ireki egingo ditugu ere, jostun profesional batek lagunduak eta beharrezko makina, tresna eta materialekin hornituak.

• Josketa lantegi irekia: mota guztietako konponketak egiteko.
• Upcycling lantegi irekia: mozorro zaharra beste berri batean bihurtzeko.

Behin MOZORROTRUK bukatuta, saldu gabe geratuko diren mozorroak baita dohaintzan utzi direnak ere, Emaus Gizarte Fundazioaren dendetan jarriko dira salgai beste aukera baten bila.

NON eta NOIZ?

• Kokapena: Medialab pareko distribuidorean, Tabakalerako 2. solairuan.
• Datak eta ordutegiak:

MOZORROTRUK (bigarren eskuko mozorroen azoka eta trukaketa)

• Otsailak 20, 21 eta 22 
• Otsailak 27, 28 eta martxoak 1 
• Ostegun eta ostiralak: 17:30 – 19:30 | Larunbatak: 11:00 – 13:00

KONPONKETA eta upcycling lantegi irekiak

• Otsailak 22 | 11:00 – 13:00

• Otsailak 27 | 17:30 – 19:30

 INGURUNEAN, GIZARTEAN ETA EKONOMIAN ERAGINA DUEN EKIMENA

MOZORROTRUK Medialab Tabakalera, Impact Hub Donostia eta Emaus Gizarte Fundazioaren elkartetik sortutako ekimena da, eta bere helburua dibertigarria, inklusiboa eta ingurumenean ahalik eta inpaktu txikiena izango duen inauteria bultzatzea da.

Bigarren eskuko praktikek eta elkartrukeak daukaten eragin positiboa balioan jartzen duen ekimena da MOZORROTRUK,  gero eta nabarmenagoa den moda jasangarri zein kontsumo arduratsurako joerarekin bat egiten duelarik. Mundu mailan ehungintza industria kutsakorrenetakoa den testuinguru batean, honen moduko egitasmoek materialen berrerabilpena sustatu eta hondakinak gutxitzeko benetako alternatiba bat eskaintzen dute. Mozorroen bizitza luzatzeaz gain, gure gizartean errotuak dauden kontsumo ohiturek ingurumenean daukaten talkari buruzko gogoeta zabaltzeko topagune sortzaile bat erraztu nahi dugu. Xede hori Medialab Tabakalerararen beste hainbat foro eta jardueretan ere oinarrizkoa da, eta Impact Hub Donostiak bultzatzen dituenen ardatza da ere.

Era berean, ekonomia zirkularreko praktika hauen bitartez, gizarte-bazterketa arriskuan dauden pertsonaen lan merkaturatzea laguntzen dugu, Emaus Gizarte Fundazioaren gizarteratze enpresen bidez.

Egizu bat MOZORROTRUKekin eta sortu dezagun elkarrekin jasangarriago, inklusiboago eta sortzaileago izango den Inauteria!

Oharra: azkoan zein lantegietan parte hartzeko ez da beharrezkoa izena ematea, bertaratzearekin nahikoa izango da.

La entrada Badator Mozorrotruk! se publicó primero en Impact Hub Donostia.

Abenduaren 4an, jardunaldi tekniko bat egingo da Arima hotelean, HORECA sektorea elikagaien xahuketari buruzko araudira eta erabilera bakarreko ontzien alternatibetara egokitzeko.

Gaur goizean, José Ignacio Asensio Gipuzkoako Foru Aldundiko Jasangarritasuneko diputatuak, Ibon Leunda Gipuzkoako Ostalaritza Elkarteko zuzendaritza-batzordeko kidearekin eta Xabier Arizmendi Impact Hub Donostia-ko Gourmet Bag proiektuaren arduraduna, Gourmet Bag proiektuaren edizio berria aurkeztu dute. Ekimen honek, oraingoan, ontzi itzulgarrien aldeko apustua egiten du, materialak berrerabiltzea sustatzeko eta Gipuzkoako taberna eta jatetxeetan elikagaien alferrik galtzea ekiditeko.

Itzultzeko ontzien sistema bultzatzea

Gourmet Bag 2024 programa Gipuzkoako hainbat herritan banatutako zazpi establezimendu piloturekin hasiko da, jatetxe gehiagotan zabaltzeko helburuarekin. Parte hartzen duen establezimendu bakoitzak Pack Gourmet bat jasoko du, itzultzeko 25 ontziz eta 50 paper-poltsaz osatua. Ontzi horiek aukera emango diete bezeroei janarien soberakinak eramateko eta etorkizuneko bisitetan ontziak itzultzeko, eta higienizatu egingo dira berriro erabili ahal izateko.

Prentsaurrekoan, José Ignacio Asensiok ekimen horren garrantzia nabarmendu zuen: “Gipuzkoan, urtean 127.000 tona elikagai alferrik galtzen dira, eta HORECA sektorea da kopuru horren % 10aren arduraduna. Testuinguru horretan, Gourmet Bag 2024 funtsezko ekimena da elikagaiak xahutzeari aurre egiteko. Arazo horrek, ingurumen-inpaktu esanguratsua izateaz gain, gizarte-arazo larriak planteatzen ditu. Gure jatetxeetan ontzi itzulgarrien sistema bat sartzean, aurrera egiten ari gara ostalaritza-eredu arduratsuago eta jasangarriago baterantz. Onartezina da milioika pertsonak gose diren mundu honetan baliabide baliotsuak alferrik galtzen jarraitzea. Ostalaritza Elkartearekin eta Impact Hubekin lankidetzan aritzea funtsezkoa da sektoreko eragile guztiak ezinbesteko aldaketa horrekin bat egiten dutela bermatzeko”.

Ibon Leundak trantsizio horretan ostalaritza-sektoreak duen zeregina azpimarratu du: “Establezimenduetako arduradunek eta bezeroek Gourmet Bag kanpainetan topatu duten sentsibilizazio eta onarpen handiak haratago joatea bultzatu, animatu eta ia behartzen gaitu, 2024an finkatu dugun erronka berri honekin. Ziur gaude kanpainaren fase berri honek Gipuzkoako ostalarien kolektiboari lagunduko diola elikagaiak xahutzeko araudi berrian ezarritako betebeharrak bere gain hartzen eta betetzen. XXI. mendeko gastronomian Gipuzkoak munduko erreferente izaten jarraitzen duela erakutsiz, ez bakarrik kalitate-ezaugarriengatik, baita maila guztietan duen lehiakortasunagatik ere”.

Bestalde, Xabier Arizmendik adierazi duenez, “esperientzia pilotu bat da, eszenatoki ezin hobean kokatua; izan ere, Gourmet Bag-aren aurreko edizioetan jasangarritasunaren arloan inplikatuta zeudela erakutsi zuten establezimenduen datu-base zabala dugu, ohiko bezeroen artean itzul daitekeen sistema probatzeko orduan”.

Prestakuntza eta informazio-materiala

Proiektuak jatetxeetako langileei prestakuntza espezifikoa ematea barne hartzen du, kanpainan aktiboki parte hartzearen garrantziaz sentsibilizatzeko. Era berean, atxikitako establezimenduetan kartelak eta informazio-liburuxkak banatuko dira, bezeroen parte-hartzea sustatzeko eta itzultzeko ontziak erabiltzearen onurak ikusarazteko.

Gourmet Bag proiektuaren ibilbidea

Gourmet Bag proiektua 2018an hasi zen, ekimen pilotu gisa, Donostiako zenbait jatetxetan. Harrezkero, Gipuzkoako 21 udalerritako 145 establezimendutara zabaldu da, eta berrerabil daitezkeen 13.300 ontzi baino gehiago banatu ditu sei urteko ibilbidean. Bilakaera horrek ekonomia zirkularraren erreferente gisa finkatu du proiektua, eta elikagaien alferrik galtzea murrizten lagundu du kontzientziazioaren eta irtenbide berritzaileen ezarpenaren bidez.

Urteetan zehar, kanpainak herri berriak sartu ditu, hala nola Pasaia, Lasarte-Oria, Errenteria, Hernani eta Oiartzun, eta ontziak berrerabiltzeko eta itzultzeko eredu aurreratuago baterantz egokitu du bere ikuspegia, Europako araudiekin eta Garapen Jasangarrirako Helburuekin (GJH) lerrokatuta.

HORECA sektoreko jardunaldi teknikoak

Prentsaurreko berean iragarri da HORECA sektoreko jasangarritasunari buruzko jardunaldi teknikoak egingo direla abenduaren 4an, Donostiako Arima Hotelean. Jardunaldiok honako hauek izango dituzte ardatz:

• Elikagaiak xahutzeari buruzko araudia aplikatzea.
• Erabilera bakarreko ontzien alternatibak.
• Erakundeek sektorea arau-eskakizun berrietara egokitzea errazteko emandako baliabideak.

José Ignacio Asensiok nabarmendu duenez, “elikagaien hondakinen murrizketa funtsezko zutabea da klima-aldaketaren aurkako borrokan, bai eta betebehar etiko eta sozial bat ere. Erakundeen, enpresen eta herritarren arteko lankidetza funtsezkoa da guztiontzako eredu jasangarraigo eta bidezkoago baterantz aurrera egiteko”.

La entrada Gourmet Bag 2024k ontzi itzulgarriak estreinatzen ditu jasangarritasuna mahaira eramateko se publicó primero en Impact Hub Donostia.

Programa Impact Hub Donostiak bultzatzen du eta 2024ko maiatzetik urrira garatuko da dohainik, Gipuzkoako Foru Aldundiko Ekonomia Sustapen eta Proiektu Estrategikoetako Departamentuaren laguntzari esker.

Eraldalanek Sistema Bizien Teoria eta “OATS” ereduarekin lan egiten du, pertsonak, prozesuak eta erakundearen helburua lotzen dituzten 6 kategoria hauetan oinarrituta: Helburua eta balioak, Zaintza, Komunikazioa, Moldagarritasuna, Autonomia, Lidergotza bideratzailea

Programa (hemen deskargatu) 3 bloke osagarritan banatuta dago, gure antolaketa-ereduetan eta lidergo kontzientean aurrera egiten lagunduko diguten ezagutzak, tresnak eta praktikak ezagutzeko eta integratzeko. 

• Maiatzak 30. Debegesa – Eibar. 09:30-11:30. Erakundearen autodiagnostikoa. Erakunde bakoitzaren ongizate-egoera baloratzeko saio bat, Eraldalan autodiagnostikoaren tresna digitalarekin. Beste erakunde batzuekin batera aukerak identifikatzeko, esperientziak eta errealitateak partekatzeko espazioa izango dugu. 
• Ekainak 20 / Irailak 19. Debegesa – Eibar. 09:30-11:30. Prestakuntza. 2 saio teoriko-praktiko, antolakuntza-eredu berriak ezagutzeko eta lidergo kontzienterantz entrenatzeko:
  • Lidergo bideratzailea eta komunikazio eraginkorra
  • Autonomia eta moldagarritasuna
• Urriak 24. Donostia. Networking ekitaldia. Programa profesionalen arteko topaketa batekin amaituko dugu, eta enpresa-lidergoaren eta -eraldaketaren esparruko erreferenteak ezagutuko ditugu; horrez gain, parte-hartzaileen artean elkarrizketarako eta indagaziorako espazioak partekatuko ditugu.

Parte hartu nahi duzu?

Parte hartu nahi duzu? Gipuzkoako erakunde sarean parte hartzea gustatuko litzaizuke? Zure taldearekin aurrera egiteko eta lidergo kontzienteago batean garatzeko modu edo eredu berriak ezagutu nahi badituzu, jar zaitez harremanetan Impact Hub Donostia taldearekin, formulario hau betez, eta xehetasun gehiago bidaliko dizkizugu programari, datei eta beste datu interesgarri batzuei buruz.

Autodiagnostikoari buruz

Zure erakundearen osasun-egoera ezagutzea eta hobetzea gustatuko litzaizuke?

Eraldalan autodiagnostikoa tresna digital eta ireki gisa sortu zen, taldeen zerbitzura, erakundeak eraldatzeko aukerak errazago identifikatzeko. Autodiagnostikoak OATS ereduaren  hiru ardatzetan (pertsonak, prozesuak eta helburua) eta 6 kategoriatan (lidergo bideratzailea, zaintza, asmoa eta balioak, autonomia, moldagarritasuna, komunikazioa) oinarritutako balorazioa egiten du.

Eskatu zure autodiagnostikoa.

Erakunde Eraldaketa sare zabala

Ondorengo erakundeek parte hartu dute Eraldalaneko aurreko edizioetan: Hettich, Cyber Surgery,  HRE automation, Viajes Eroski, Matia Fundazioa, Mondragon Goi Eskola Politeknikoa, Emaús Fundación Social, Landaola Gipuzkoako Landa Garapen Elkartea, Surfrider, el Colegio Oficial de Farmacéuticos de Gipuzkoa, etc.

La entrada Martxan da Eraldalan, lidergo eta erakunde eraldaketa programa se publicó primero en Impact Hub Donostia.

Impact Hub Donostiatik Ze-laia! ren 3. edizioa aurkeztu dugu, eragin positiboa bilatzen duen ekintzailetza programa; izen ematea zabalik dago negozioak beste modu batean egin daitezkeela sinesten duten personentzat. 

Ze-laia! EZ da start-up azeleratzaile bat; ez horixe! alternatiba gisa, maila pertsonal-profesionala landu eta esperimentatzeko espazio bat proposatzen du, erritmo kontziente eta sentikorretik abiatuta. 

Izen emate epea martxoaren 4a arte egongo da zabalik (15 plaza daude) eta programa apirilaren 8tik

 uztailaren 22ra garatuko da. Prozesua guztiz doanekoa da, Gipuzkoako Foru Aldundiko Ekonomia Sustapeneko eta Proiektu Departamentuaren laguntzari esker.

Banakako eta taldeko prozesua

Ze-laia!-ren prozesuak 3 fase jarraitzen ditu, ideiatik proiektuaren ekintza planera dijoana (kontzeptua, estruktura eta planifikazioa).

Esperientzia oso bat da, taldean eta indibidualki garatzen dena: alde batetik, ekintzaileek formakuntza eta praktika saioak izango dituzte taldean, haien proiektuen oinarriak 4 eragin ardatz nagusien arabera definitu eta garatzeko: ekonomikoa, soziala, ingurumena eta gobernantza. Beste alde batetik,  tutoretza pertsonalizatuen bidez ekintzailetza proposamena garatzeko aukera izango dute, konfiantzazko profesional baten gidaritzarekin. Guztira, 60 ordu baino gehiago ekintzailetza prozesua gauzatzeko.

Azpimarratzekoa da talde sesioak astean behin garatuko direla, astelehenetan, 15:00etatik 18:00etara Impact Hub Donostian. Parte hartuko duten 15 ekintzaileek programak adierazitako egutegia bete beharko dute, eta aurreikusitako saioetara proaktiboki bertaratu, taldearen martxa ona errazteko.

Ezagutu programa osoa hemen.

Zalantzarik? Parte hartu online aurkezpenean

Online bidezko aurkezpen bat prestatu dugu, otsailaren 19an 15:00etan programa azaltzeko, zalantzak argitzeko eta aurreko edizioetako esperientziak partekatzeko asmoarekin. Interesa baduzu eman izena aurkezpenean inolako konpromisorik gabe; zure aukera izan daiteke!

Argi duzu? Eman izena Ze-laia!-n

Ze-laia! taldean izan behar zarela sentitzen baduzu, eman izena eta bidali zure proposamena galdetegi honen bidez. Zu ezagutzeko irrikitan gaude!

La entrada Ez bizkortu, ekin Ze-laia!rekin se publicó primero en Impact Hub Donostia.

Bosgarren edizio honetan, kanpaina Gipuzkoako bost udalerri berritara iritsi da; horrela, guztira, 21 udalerrik bat egin dute Gourmet Bag ekimenarekin 2018an hasi zenetik.

“Gourmet Bag” kanpainek herritarren sentsibilizazioa sustatzen dute, aisia gastronomikoaren kudeaketa arduratsuan arreta jarriz eta plateraren soberakinak etxera eramateko aukera eskainiz.. Gainera, Gourmet Bag kanpainaren helburua da establezimenduetan ohikoak diren plastikozko ontzien ordez beste ontzi biodegradagarri batzuk jartzea.

Aurtengo edizioan, proiektuak 25 establezimendu berri hartuko ditu, Elgoibar, Zumarraga, Ordizia, Legazpi eta Oñatiko udalerrietan kokatuak. Horien artean, establezimendu bakoitzean, paper birziklatuz egindako eta mikrouhin-laberako egokiak diren 80 ontzi ekologiko banatu dira, 80 paper-poltsarekin batera. Gainera, Gourmet Bag % 100 biodegradagarria eta konpostagarria den materialez osatuta dago.

Ekimen hau Gipuzkoako Foru Aldundiko Ingurumeneko eta Obra Hidraulikoetako Departamentuak bultzatzen du, eta Impact Hub Donostiak gauzatzen du, Gipuzkoako Ostalaritza Elkartearekin lankidetzan. Agenteen arteko aliantza horren ondorioz, dagoeneko 112 taberna eta jatetxe inguruk bat egin dute elikagaien xahutzea murrizteko erronkarekin, “Eramandako jakia ez da soberakina” lelopean.

Elikagaiak xahutzea ingurumen-arazo bat da, krisi klimatikoa larriagotzen duena, eta, gainera, etikoki inmorala eta sozialki bidegabea den arazo bat da.

Gourmet Bag ekimen irekia da eta interesa duten establezimendu guztiak jar daitezke harremanetan Gipuzkoako Ostalaritza Elkartearekin edo Impact Hub Donostiarekin.

La entrada 21 udalerrik bat egin dute Gourmet Bag ekimenarekin se publicó primero en Impact Hub Donostia.

Prozesua erronka handia izan da, erakundea laguntza ematen hasteko unean zegoen aldaketa-uneagatik. Hilabete hauetan zehar, talde-kohesio handia sortu da, aurre egiteko konfiantza eta segurtasuna garatu dira, eta erakundearen barruan askotariko ahotsak zabaldu dira. Prozesu osoan Impact Hub Donostiako Joxean Hernandez eta El Camino del Elder-eko Isa Campo izan dira.

Mila esker Grupo Emaús Fundación Social gugan jarri duzuen konfiantzagatik. Talde aparta osatzen duzue eta ziur gaude etorkizun ederra eta oparoa izango duzuela. Segi bidea egiten!

Erakunde eraldaketara zuzenduriko hurrengo geldialdia uztailaren 14an 12:00etatik 13:30era Tabakalerako Eskonditean, Eraldalan programarekin.  Jarrai dezagun erakundeetara kontzientzia ekartzen eta elkarrengandik ikasten.

La entrada Emaús Fundación Social-ekin etorkizuna irudikatu dugu se publicó primero en Impact Hub Donostia.

Jardunaldia aukera paregabea izan zen gure esperientziak, kezkak eta proposamen ekintzaileak konektatzeko, baita arnasa hartzeko, barre egiteko eta konfiantza sarearekin gozatzeko ere. Komunikazioa eta konexioa izan ziren topaketaren ardatz nagusiak eta argi gelditu zena izan zen guztiak komunikatzen duela. Hala erakutsi ziguten gure eguneko hizlariek, komunikazio-kontzientzia piztera, komunikazio eraginkorragoa garatzeko gakoei arreta jartzera eta gure komunikazio-prozesuak nola hobetu dezakegun hausnartzera gonbidatu gintuztenek.

Nortasun eta magia komunikatiboa

Goizean, 10:00etatik 13:30era, Mireia Escarrék ireki zuen saioa. Marka nortasun sendoa eraikitzearen garrantzia erakutsi zigun, hitzezko identitatea eta copywritting-a oinarri harturik. Gainera, marka-arketipoetan zehar bidaiatu genuen barruan daramagun esentzia deskubritzeko. Mireia marka pertsonalaren estrategian eta negozio kontzienteen garapenean aholkulari bezala dihardu; eta komunikazioan sinesten du, aldaketarako, lidergorako eta eraginerako gako gisa. Beti da plazer bat harekin kontatzea eta konektatzea. Mila esker!

Lehenengo abiaraztearen ondoren, sare ekintzailea bitaminaz eta bibrazio onez betetako networking afrutatu batean elkartu zen. Eta, ondoren, Silvia Osések bere pasio eta magia eszeniko guztia eskaini zigun ahozko aurkezpen batean arrakasta izateko aholku praktikoak emateko. Hitzik gabeko lenguaiari, konbentzitzeko komunikazioari, edukien egiturari eta baliabide bisualei buruz hitz egin genuen. Silvia Osés Komunikazio, Marketin Digital eta Marka eta Edukien Estrategiaren aholkularia da. Harrigarria da zuri entzutea eta zure kondairetan murgiltzea. Mila esker!

Partekatzen jarraitzeko gogo handiarekin, sormenez eta berrikuntzaz osaturiko menu gastronomikoa dastatzera pasa ginen, Batirtze eta Erikarekin, El Eskondite Tabakalera espazio eta proiektuaren sortzaile eta bultzatzaileekin. Ezagutzen ez baduzu, inoiz ikusi eta dastatu ez duzun buffet bat ezagutzera eta dastatzera animatzen zaitugu, “in jars” plazer gastronomikoa. 

Eta zaporerik, barre eta konpainiarik onenarekin, egunaren bigarren zatira iritsi ginen, non hitzetik gorputzera igarotzeko aukera izan genuen.

Genero ikuspegiarekin, ekin

Arratsaldea genero-ikuspegidun komunikazioari buruzko sarrerarekin hasi ginen, guztiontzat funtsezkoa den gaia. Patricia del Olmok lan eremuan genero-ikuspegia duten egoera eta gramatika-arauak zalantzan jarri eta hausnartzera gonbidatu gintuen. Patriciak komunikazioaren eta generoaren esparruan dituen irizpideak azaldu zizkigun, eta gure ohiturak berrikustera eta hizkuntza praktikatzera gonbidatu gintuen. Patricia Psikologian lizentziaduna da, eta E_Learning edukien prestatzailea eta sortzailea ere bada. Aholkularia eta berdintasun-agentea, balio anitzeko emakumea, inor axolagabe uzten ez duena. Mila esker!

Eta orduan iritsi zen Laura Céspedes, gorputz proposamen harrigarriarekin. Laurak zutik eta mugimenduan jarri gintuen, gure komunikazio ereduarekin konektatzeko eta sentitzeko, oztopoak identifikatzeko eta hobetzeko urratsak partekatzeko. Laura Céspedes enpresa-prozesuen eta taldeen lidergoen aholkularia da, baina, horrez gain, emakume ausarta, kementsua eta kohesionatzailea da, ekiteko eta aurrera egiteko behar dugun txinparta hori pizteko gai dena. Mila esker!

Tenperatura eta emozio altuekin, Noelia Jimenezek sentsazio eta ideia horiek guztiak komunikazio proposamen zehatzetan gauzatzeko bidea markatu zuen. HUBemprendedorAs emakumeen sarea komunikatzen eta indartzen jarraitzeko proposamen inspiratzaile ugari sortu ziren. Eskerrik asko Noelia, zure esperientzia eta ibilbide profesionala partekatzeagatik eta HUBemprendedorAs-en ahotsa eta ibilbidea proiektatzeagatik.

Eskerrik asko ekitaldian parte hartu zenuten guztiei, baita etorri ezin izan zinetenei ere, sare hau osatzeagatik. Saioan ateratako ideia, esperientzia eta proposamen guztiak bilduko ditugu eta laster izango duzue gure berri, programaren seigarren edizioaren informazioarekin. Adi egon!

Eskerrik asko Donostiako Udaleko Berdintasun Sailari proiektua babesteagatik.

La entrada Konexio bizia HUBemprendedorAs sarean se publicó primero en Impact Hub Donostia.

La entrada Irtenbide iraunkorrak Mauritanian, Gipuzkoa Kooperarekin se publicó primero en Impact Hub Donostia.

Gazte Ekoliderrak Kutxa Ekoguneak lideratutako jasangarritasunean eta eraldaketarako lidergoan oinarritzen den formakuntza eta bizitzarako ibilbidea da. Hiru dimentsio lantzen ditu: Trebatu, Ekin eta Izan. Guztira 15 pertsonek parte hartu dute eta lau proiektu garatu dira.

EKIN programaren helburua gazte ekoliderrei ideietatik ekintzetara pasatzen laguntzea da, taldean lan eginez eta gizarteko erronka ezberdinei irtenbideak emateko jasangarritasuna oinarri izanik. Horretarako metodologia berritzaileak erabili genituen, U Teoria, Double Diamond eta Design Thinking-ean oinarritutako teknika ezberdinak, hain zuzen ere.

Ostiraleko helburua erronka finkatzeko tresnak lantzea izan zen. Horretarako, ikerketa eta analisirako datuak eta inspirazio kasuak aztertzea proposatu genien dinamika ezberdinen bidez. Honek erronkak hobeto ulertu eta kokatzeko aukera eman zien ekoliderrei. Amaitzeko, lehen ideiak sortu eta horietatik onenak edota egingarrienak sailkatu zituzten.

Larunbatean, egun berezia izan genuen. Goizean balio proposamena  eta lehen kontzeptuaren diseinua landu ziren, eta 3D mapaketaren bitartez diseinatutako lau kontzeptuak prototipatu zituzten. Arratsaldean, akzio plana eta salmentarako lehen eredua sortu ziren, prozesuari itxiera emanez.

Intentsitate handiko bi egun izan dira eta gazteen motibazioa izugarria izan da asteburu osoan zehar. Orain, sortutako irtenbideak balidatzeko momentua dute. Emaitzak maiatzaren 6an ikusiko ditugu. Mila esker guztioi!

La entrada Ekin eta Ekin Gazte Ekoliderrekin se publicó primero en Impact Hub Donostia.

EMAN IZENA!

Dei hau Donostiako Ulab-en zortzigarren edizioaren amaierarekin batera sortu da, berriro ere, oso prozesu bizia eta berezia lehen pertsonan bizi izan dugunontzat. Bai Mikel Arrizabalagak (Sukhena), bai nik, Joxean Hernandez-ek (Impact Hub Donostia), bideratzaile rolean, 10 laguneko talde batekin gozatu dugu, eta U teoriak eskaintzen dizkigun tresnak gardentasun, zintzotasun eta apaltasun handiz aztertu ditugu. Bidean, entzute enpatiko eta sortzailea praktikatu dugu, gure proiektuetan blokeatzen gaituena aurkitu dugu, aurrera egiteko bideak ezagutu ditugu, etorkizun potentziala prototipatu dugu, elkarri laguntzeko eta feedbacka emateko espazioak izan ditugu, eta elkarrekin “EKO”-rako urratsak eman ditugu “EGO”-ren amarrak askatuz.

Ulab-en edizio honi amaiera emateko, ilusio berezia egiten digu U Teoriak gure lurraldeko hainbat lekutan sortzen ari den inpaktua ikusarazteak. 2015. urtean Impact Hub Donostian lehen Ulab sortu zenetik, U Teoria unibertsitatera, Gipuzkoako landa-ingurunera eta enpresa-ingurunera iritsi da. Euskarazko baliabideak eta edukiak ekoiztu dira, eta, gaur egun, eraldaketarako eta garapen iraunkorrerako funtsezko tresna gisa hedatzen jarraitzen du, bai erakunde publiko eta pribatuentzat, bai planeta honetan bizi garenontzat.

Topaketa Tabakalerako El Eskonditen egingo da, 17:00etatik 19:00etara, U Teoriaren inguruko esperientziak eta kasu praktikoak entzun eta partekatzeko:

• GI2030: Ikuspegi partekatua elkarrekin sortuz Gipuzkoan zehar. Antonio Casado, EHU.
• Euskozenoa: Aro berrirako ikuspegi euskofuturistak. Irune Gonzalez, DOT S.Coop.
• U tresna kaxa: euskarazko Teoria U tresna-kutxa, Verena Hammes, Impact Hub Donostia.
• Landaola: Gipuzkoako Landa Garapen Elkarteen Federazioa U Teoria aplikatzen. Manex Aranburu, GOIMEN/LANDAOLA.
• Fagor Automationen Kultura Kooperatiboa Bultzatzen Ulab 2x- ekin. Isabel Gonzalez eta Mikel Serrano.

Ondoren, World Café formatuan, U Teoria hainbat testuinguru eta errealitatetan aplikatzeko dauden oztopoak eta aukerak aztertuko ditugu, hala nola, administrazio publikoan, enpresa-munduan edo gizartean.

Topaketa doakoa da eta mokadu txiki bat izango dugu El Eskonditeko gure lagunen eskutik. Izena eman eta ospatzera etorri besterik ez duzu egin behar.

EMAN IZENA

Ekitaldi hau Gipuzkoako Foru Aldundiko Partaidetza Departamentuaren laguntzarekin eta EHUren laguntzarekin egingo da.

La entrada Zatoz Ulab-en itxiera ekitaldia ospatzera! se publicó primero en Impact Hub Donostia.